موضوعات أخرى

كلمة منّي وإلي - "الجزءالأول"

حكايات من الشارع
كلمة منّي وإلي - "الجزءوالأول"
بقلم : عايدة عزب

اليوم وبعد وقت طويل من الهروب من هاد اللِّقاء، بسبب خوفي من جروح لسَّه مش مشفيَّة، حيرتي، وخجلي وضياعي في غرف لسَّه مطفيَّة...

تعالي نقعد لأنّه هاد هو اليوم الّي بدّي أتقابل فيه معاكِ "مع نفسي"، وأحكيلك -بعد مرور ٣٠ سنة- كلام يمكن أوَّل مرَّة بتسمعيه منّي: أنا فخورة فيكِ... آه فخورة فيكِ رغم كلّ فشل مرّيتِ فيه، رغم كلّ غلط اغلطتيه، رغم كلّ محل لسّه واقفة فيه، رغم كلّ موقف مش عارفه تتخطّيه لليوم.

فخورة لأنّي اليوم بتطلَّع على مشوارك وببتسم؛ لأنّي قادرة أشوف خلف الكواليس، لأنّه أنا وإنتِ عارفين أنِّك غالبة ومُحاربة وصامدة، لم تُفقَدي ولن تُفقَدي وسط كل الزّحام. كل علامة فيكِ؛ بملامحك، بشكلك، وشخصيتك، اليوم بقدر أحكيلك أنها مصدر فخري فيكِ.

 

بتذكري كم مرَّة تخطيط قلب الحياة طلع عندِك خطّ مستقيم؟ وكم مرّة قلتِ: ما بعرف كيف أجيب قوّة للنَّفَس الجاي؟ كنتِ لحالِك وما حدا جنبك، لكن ظلّيتك قويّة... كلمة منِّك كانت بتعمل زي الصّدمة الكهربائيَّة، وبتخلِّي المؤشِّر يحكي أنِّك حيَّة.

مصدر قوتك سماوي مش أرضي، إلهي مش بشري، رحلتك لسّه في أوَّلها، لكن في كلّ مرّة بتتعبي فيها اتذكَّري أنِّك مش عاديّة.

 

بتذكري آخر مرَّة قلتلِّك فيها بحبِّك؟ كتير زمان... يمكن انسيت كيف أحكيلك إيّاها، وانسيت كيف أحبِّك، وأقبلِك، وأغفرلك، وما أكون قاسية عليكِ. اليوم أنا محتاجة أحكيلك سامحيني؛ لأنّي حمَّلتِك أكبر من طاقتك، لأنّي لُمتك كتير، وفي أوقات كتيرة طوَّلت عليكِ رحلتك، متأسفة على كلّ مرّة كنتِ محتاجة فيها حضن وطبطبة وما اعمِلْت هيك، ولا حتّى كنت أقبل أنِّك تحكي أنِّك محتاجيتها، متأسفة على كلّ مرّة قلتلِّك فيها إنّه دموعِك ضعف.

 

من اليوم بدي أتعلَّم كيف أحبِّك -حتى لو انسيتِ كيف بتِنحَبِّي- بحبِّك؛ لأنِّك ما استسلمتِ، بحبِّك؛ لأنّه اليأس ما قدر ياخدك منّي، بحبّك رغم السنين الّي قضيتيها في غرفة طوارىء السَّما، بحبِّك لأنّه الموت ما عرف يوصلِّك.

 

عارفه أنّه المشوار طويل والكلام لسّه كثير، بس تعالي اليوم انبلِّش عهد جديد، انسلِّم كلّ الماضي لصاحب المشوار الحقيقي؛ "إلهي وسيدي"، حتّى يغسل ويزبِّط ويداوي، ويرَجِّعلي الصُّورة الحقيقيّة، ويعيد إصدار الهويّة بدل فاقد.

ولسّه كلامنا إله بقيَّة… يتبع 

 

مواضيع ذات صلة:

كلمة منّي وإلي - "الجزء الثاني"

كلمة منّي وإلي - "الجزء الثالث"

للمشاهدة:

كلمة منّي وإلي - "الجزءالأول"

 

إضافة تعليق
بريد ألكتروني