موضوعات أخرى

مُذكِّرات عروس مُهاجرة

حكايات من الشارع
مُذكِّرات عروس مُهاجرة
بقلم : ميكال حدَّاد

قعدت وحدي في العتمة، والهدوء مُزعج كثير. فكَّرت بحالي: عروس جديدة، ببلد غريب، كل شي جديد، أصدقائي وأهلي بعاد مسافات كبيرة. كيف قرَّرت أترك كلّ إشي وأعيش بمكان تاني؟ مين أنا هون؟ "أنا العروس الِّي أجت من لبنان": هاي هيّه هويتي، هيك العالم بيعرفني!

صارت الأفكار تاخدني وتجيبني، وللحظة بديت أحسّ حالي متروكة وضايعة بالرَّغم من أنِّي بعرف إنِّي تركت بلدي بإرادتي، وبفرح أنّي أشارك حياتي مع رجل رائع بحبني وبحبه. بهديك اللَّحظة، سمعت صوت بقلبي بقول: ميكال، ليش الأفكار هاي؟ إنتِ هون مش بالصُّدفة، الله عارف كلّ تفاصيل حياتِك وماشي معِك بكلّ خطوة.

كلّ مرَّة بتواجهي مرحلة جديدة بحياتِك أو بصير تغيير في ظروفِك، أوَّل ردة فعل بتحسِّيها هي الخوف. بطبعنا كبشر إحنا منخاف من أشياء كثيرة، مرَّات الخوف مُفيد لأنّه بيعطي عقلك إشارة أنّه هالموقف هاد مش مألوف ولازم تنتبهي وتاخدي احتياطاتِك، لكن إذا زاد الخوف عن الحدّ الطَّبيعي ممكن يعيق حياتك ويسلبك فرحك.

لمَّا وصلت على الولايات المتَّحدة ومرّ أوَّل كم أسبوع، بلَّشت أستوعب التَّغيير الكبير الِّي عم بواجهه، وهلَّا كلَّما أشوف شخص هاجر، أو صبيَّة تركت أهلها وتزوَّجَت وسافرت على بلد ثاني بفهم الشُّعور الِّي بيختبروه. إذا كُنتِ بهالوقت عم بتواجهي أي أمر جديد في حياتك، خلِّيني أشاركك بكم نقطة أنا تعلَّمتها:

أولًا، الله مرافقك، وهاد أهمّ أمر لازم تتذكَّريه. هوِّه معِك، يعني لو أقرب الأشخاص مش موجودين حواليكِ، هوّهِ دايمًا رح يكون موجود، صديق حاضر يسمعك ويشوف دموعك، ولا دمعة بتنزل من دون علمه أو بفرِّط فيها. هوّهِ مش بس مرافقك هوِّه عارف شو رح يصير، وماسك تفاصيل حياتِك بإيدو من قبلما تولدي. حتَّى لو ظروفك إجت مُفاجأة إلِك، هوِّه ما في أيّ أمر بفاجئه. استخدمي هالوقت حتى تتحدَّثي معه وتاخدي علاقتك معه لدرجة أعمق.

تانيًا، ما تخلِّي مشاعرك تقودِك، إحنا النِّساء، الله أعطانا حِسّ مُرهَف، وأعطانا إنّه نشعر بالأمور بشكل عميق. لكن مفروض نسيطرعلى مشاعرنا، لأنّه ممكن تحسِّي حالك ساعة خايفة، وساعة فرحانة، وساعة متوترة وبتفكري. الإنجيل بقول:  "ذو الرأي المُمَكَّن تحفظه سالمًا سالمًا لأنّه عليك متوكِّل." (إشعياء ٢٦: ٣). خلِّي رأيك مُمَكَّن، يعني ثابت مش متقلقل، مش كلّ يوم موقفك يتغيَّر. الرَّب ما بدّو إيَّاكِ تتقلَّبي مثل موج البحر، لكن إذا بتوثقي فيه بتنالي طلبك وبتلاقي سلام (يعقوب ١: ٦). حاربي الأفكار المتنوعة الِّي بتلاحقك وخلِّي قلبِك يكون مليان بسلامه حتى تقدري تتصرَّفي بحكمة.

ثالثًا، استفيدي من الفرص. التَّغيير هو شي جديد؛ يعني أمر إنتِ ما عشتيه من قبل، فاستمتعي بالفرصة، افتحي عيونِك وأذنك وذهنك. تعلَّمي مهارات جديدة، اسألي، استفسري، طوري نفسك، وخلِّي الاختبار الِّي بتعيشيه يساعدِك إنّك تتقدَّمي. خلِّي عندك فكر إيجابي وافرحي بالأمور الصغيرة.

مش كلّ تغيير منواجهه حلو أو سهل، لكن بكل المواقف الله حاضر يمسك إيدِك ويرافقك ويعلمِك. بذكر اللِّيلة الِّي قلقت فيها وقعدت أفكِّر... سنين مرَّت الله كان فيها أمين معي ومواقف كتيرة واجهتها، ولا مرَّة خذلني، وهلَّا بتطلَّع على الوقت الِّي مرق وبشوف كيف الله كان حاضر بكل لحظة.

 

 

 

إضافة تعليق
بريد ألكتروني