موضوعات أخرى

مرحلة تدريب

موقف القلب
مرحلة تدريب
بقلم : ميكال حدَّاد

هل عمرِك فكرتِ تنضمِّي لنادي مُلاكمة؟ مش مزحة! بقولوا المُلاكَمة إلها منافع كثيرة للمرأة، مثل: حرق الدُّهون بشكل سريع بمنطقة البَطِن، وتعلُّم أساليب للدِّفاع عن النَّفس. الحقيقة أنّه مرَّات ممكن تحسِّي حياتك اليومية عبارة عن شوط مُلاكمة؛ صراعاتِك مع النَّاس، تحدِّيات في الشُّغل، أمراض أو حوادث غير مُتَوَقَّعَة، مَخَاوفك، دِراستِك، أو حتى علاقاتِك مع الغير ممكن تخلِّيكِ تحسِّي حالِك في حَلَبة مُصارَعَة.

الملك داود كَتَب بمزمور ١٤٤: ١:  "مبارَكٌ الرَّبُّ صَخرَتِي، الَّذي يعلِّم يَدَيَّ القِتَال وأصابعي الحرب". ما بَظُن داود كان بيقصُد الحرب بالمعنى الحرفي؛ كان حاسِس كأنه موجود في تدريب، والله هوِّه المُدَرِّب. الحقيقة إنّو التّدريب عادةً صعب وبِوَجِّع. اسألي أي ملاكِم بِخبرِك إنه كُل رِياضة من هالنّوع بتسبِّب أوجاع كتيرة في الجسم بشكل عام، وخاصَّةً مفاصل اليد والأصابع.

إذا كُنتِ بتمرِّي بأمر مزعِج هالأيَّام، من الممكن تكوني بمرحلة تدريب. ممكن الله عم بدرِّب أصابعِك وإيديكي وبجهزِك لمرحلة أعلى أو مُهمّة أكبر. ما تخافي: الله هوِّه المُدَرِّب، وهوِّه أفضل مُدَرِّب ممكن تحصلي عليه. مش بس هيك؛ كمان كُل شي بتحتاجيه بتلاقيه بشخصه. "رحمتي وملجأي، صَرحي ومنقذي، مجنّي والَّذي عليه توكَّلت، المُخضع شعبي تحتي." (عدد ٢)؛ داود كان بِعدِّد كُلّ الأمور إلِّى بيحتاجها بوقت الحرب: الملجأ، والمُنقِذ، والحماية، والثِّقة، والرَّاحة. بكلمات أخرى: داود كان بحاول يقول للرَّب: ’وقت التَّدريب إنتَ بِتجهِّزني، ووقت الحرب إنتَ كُلّ شي أنا بَحتاجُه‘.  

ما أجمل هالحقيقة! إذا كُنتِ متألمة، تعبانة، خايفة، أو مُحبَطَة من ظرف مُعيَّن: تذكَّري أنّك بمرحلة تدريب. اتطَمَّني أنّه إلهك مش رح يتركِك ولا بأيّ مَرحلة. هدفه إنّك تكوني حاضرة ومُنتَصرَة.   

إضافة تعليق
بريد ألكتروني